أول سكل لك: وصفة في ملف واحد
من @arimi.ai · الدليل كامل: https://aivisionsolutions.net/guides/first-skill/
من ريل «إيش السكل؟». السكل (Skill) مجرد وصفة مكتوبة في ملف نصي اسمه SKILL.md: اسم الوصفة، ومتى تتسوّى، والخطوات. تكتب طريقتك مرة وحدة، والـAI يقراها ويسوّي الشغل على طريقتك كل مرة، بدون ما تعيد الشرح. هنا القالب، ومثال الريل، وبرومبت يخلّي الـAI يكتب سكلك، وطريقة إضافته في Claude وChatGPT وGemini.
المعلومات محدّثة في 31 أكتوبر 2026. أسماء القوائم والأزرار تتغيّر من وقت لوقت.

الخطوات

1. افهم المشكلة: الـAI ما يعرف طريقتك
الـAI ما يعرف طريقتك أنت، فيسوّي أي شي يخطر على باله، أو اللي يطلبه أغلب الناس.
الحل إنك تكتب له طريقتك مرة وحدة في ملف. وهذا هو السكل.

2. اكتب الوصفة في 3 أجزاء
اسم الوصفة هو name: اسم قصير بالإنجليزي، بحروف صغيرة وبين الكلمات شَرطة، مثل khalfan-qabooli.
متى تتسوّى هو description: جملة تقول وش يسوّي السكل ومتى يستخدمه الـAI. منها يعرف إن هذا وقته.
الخطوات تحت الخط الثاني: طريقتك أنت، بكلامك العادي، خطوة خطوة. تقدر تكتبها بالعربي.
هذا ملف السكل اللي في الريل كامل:

[ انسخ من هنا ]
---
name: khalfan-qabooli
description: يتسوّى إذا خلفان جوعان.
---
# قبولي خلفان
- عيش، والدجاج فوقه.
- على الطريقة العمانية.
[ إلى هنا ]

3. خلّ الـAI يكتبه لك
ما تحتاج تكتبه بيدك. الصق البرومبت اللي تحت في محادثة جديدة، واكتب فيه الشغل اللي تكرّره، وجاوب على أسئلته. في الأخير يعطيك ملف SKILL.md جاهز.
وإذا تبي تكتبه بنفسك، انسخ القالب وعبّه.

4. أضفه للـAI اللي تستخدمه
الأسهل من الكمبيوتر. احفظ الملف باسم SKILL.md بالضبط، داخل مجلد باسم السكل.
Claude: من Settings ثم Capabilities شغّل Code execution and file creation. بعدها من Customize ثم Skills اضغط + ثم Create skill ثم Upload a skill، وارفع المجلد مضغوط ZIP (بالزر اليمين على المجلد: ضغط إلى ZIP). متوفر في كل الخطط، حتى المجانية.
ChatGPT: من Skills اضغط Create ثم Upload from your computer وارفع الملف، أو اختر Create with chat وخلّه يسوّيه معك. يفحص الملف قبل ما يشتغل. السكلز متوفرة رسمياً لحسابات Business وEnterprise وEdu، وتوصل لبعض الحسابات الشخصية كتجربة. إذا ما لقيتها عندك، سوّ Project والصق الوصفة في تعليماته (Instructions).
Gemini: من gemini.google.com اضغط Customize في القائمة الجانبية (أو More ثم Customize)، بعدها Skills ثم Create ثم Upload، واختر ملف SKILL.md أو المجلد. ما يحتاج اشتراك، بس لازم يكون عمرك 18 وفوق، وخاصية Keep Activity شغّالة.

5. جرّبه
افتح محادثة جديدة، واطلب الشغل بكلامك العادي بدون ما تذكر السكل. إذا قرا الوصفة، بتطلع النتيجة على طريقتك.
إذا ما استخدمه، وضّح الوصف (description): متى بالضبط يستخدمه، وبأي كلمات يطلبه الناس.

القالب

انسخه، وبدّل الكلام اللي بين القوسين:

[ انسخ من هنا ]
---
name: my-skill-name
description: [وش يسوّي السكل، ومتى يستخدمه الـAI]
---
# [اسم الوصفة]
- [الخطوة الأولى]
- [الخطوة الثانية]
- [الخطوة الثالثة]
- مثال: [مثال واحد من شغلك]
[ إلى هنا ]

البرومبت كامل

انسخه والصقه في محادثة جديدة، وبدّل الكلام اللي بين القوسين:

[ انسخ من هنا ]
أبي أسوّي سكل (Skill) لشغل أكرّره كثير: [اكتب الشغل هنا، مثلاً: كابشن انستقرام بلهجتي].
اسألني أسئلة، وحدة وحدة، عن طريقتي في هذا الشغل، لين تفهمها كاملة.
بعدها اكتب لي ملف SKILL.md كامل:
- في أوله name: اسم قصير بالإنجليزي، بحروف صغيرة وبين الكلمات شَرطة.
- وdescription: جملة تقول وش يسوّي السكل ومتى تستخدمه.
- وبعدها خطوات طريقتي بكلام بسيط، مع مثال واحد.
خلّه قصير وواضح، وبدون أي كلمة سر أو مفتاح أو معلومة خاصة. وإذا تقدر تضيفه كسكل عندي مباشرة، أضفه.
[ إلى هنا ]

ملاحظات

- سكل واحد لشغل واحد. عندك أكثر من شغل؟ سوّ لكل واحد سكل.
- الوصف أهم سطر: الـAI يشوف اسم السكل ووصفه بس، وما يفتح الخطوات إلا إذا احتاجها.
- السكلز تنفع لأي شغل: العروض، والتقارير، والمونتاج، والرسائل. أي شي تسوّيه بطريقة وحدة كل مرة.
- لا تحط في السكل كلمات سر أو مفاتيح أو معلومات خاصة.
- السكل اللي تكتبه انت لشغلك غالباً أفضل من سكل جاهز. وإذا بتثبّت سكل من حد ثاني، اسأل الـAI عنه الخمس أسئلة (https://aivisionsolutions.net/guides/skill-check/) قبل ما تثبّته.

المصادر

- السكلز وملف SKILL.md: الشرح الرسمي من Anthropic (https://platform.claude.com/docs/en/agents-and-tools/agent-skills/overview).
- إضافة سكل في Claude: مساعدة Claude (https://support.claude.com/en/articles/12512180-using-skills-in-claude).
- السكلز في ChatGPT: مساعدة OpenAI (https://help.openai.com/en/articles/20001066-skills-in-chatgpt).
- السكلز في Gemini: مساعدة Google (https://support.google.com/gemini?p=b_ws_skills).

من @arimi.ai · https://aivisionsolutions.net/guides/first-skill/